张爱玲提示您：看后求收藏（启明小说www.qmxs.net），接着再看更方便。
其时已交午牌，当值管家调排桌椅。瑶官乘隙暗拉琪官踅出廊下，问道：“大人教倪一淘拜姊妹，阿要拜嗄？”琪官道：“大人说末生来依俚，就一淘拜拜也无啥要紧。”瑶官道：“价末倪三个人拜个倒勿算？”琪官道：“耐末要缠煞哉，啥勿算嗄？倪三个人为仔要好，拜个姊妹，拜仔也不过要好点。故歇大人教倪拜，要好勿要好，倪自家主意，大人勿好管倪个（口宛）。”
瑶官涣然冰释，颔首无言。听得里面坐席，两人原暗地捱身进帘，掩过一边。
不想齐韵叟特命琪官、瑶官一同入席，坐列苏冠香肩下。琪官、瑶官当着众人面前，敛手低头，殊形局促。
酒过三巡，食供两套，齐韵叟乃向史天然道：“耐该埭到上海，带仔几花物事来，无拨一点用场，我要耐一样好物事，耐定归勿送拨我。故歇搭耐饯行哉，再客气仔勿着杠哉，耐阿肯送点拨我？”天然大惊，问：“啥物事嗄？”韵叟呵呵笑道：“我要耐肚皮里个物事。耐赵二宝搭倒还有副对子做拨俚，我末连对子才无投，阿是欺人太甚？”天然恍然悟道：“我为仔四壁琳瑯，无从着笔。难年伯要我献丑，也无法子，缓日呈教末哉。”韵叟拱手道谢。
华铁眉因问饯行之说，天然说：“接着个家信，月底要转去一埭。”铁眉道：“倪也要饯行哉（口宛）。”韵叟道：“耐要饯行末，同葛仲英搭仔个姘头，索性订期廿七，就来里该搭，阿是蛮好？”铁眉道：“再早点也无啥。”韵叟道：“早点无拨空。从明朝到廿四，大家才有点事体。廿五末高、尹饯行，廿六末陶、朱饯行，耐同仲英只好廿七个哉。”铁眉就招呼仲英约定，天然亦拱手道谢。
适小赞将誊真的《海上群芳谱》呈上齐韵叟看了。韵叟遂令管家传谕，志正堂中安排香案；又令小赞赍这《群芳谱》四座传观。葛仲英看是一笔《灵飞经》小楷，妍秀可爱，把小赞打量一眼。高亚白油笑道：“耐（要勿）看轻仔俚，俚个衔头叫‘赞礼佳儿’，‘茂才高弟’。”尹痴鸳叉口道：“耐末喜欢拨人骂两声，为啥要带累我？”小赞在傍“嗤”的失笑，仲英一些不懂。痴鸳分说道：“俚是赞礼个倪子，人才叫俚‘小赞’。时常做点诗文请教我，亚白就同俚打岔，出个对于教俚对，说是‘赞礼佳儿’。俚对匆出，亚白就说：‘我替耐对仔罢，“茂才高弟”阿是蛮好个绝对？’”仲英朗念一遍，道：“真个对得好！”
小赞接取《群芳谱》，送往别桌上去。痴鸳悄向仲英耳边说道：“耐看俚年纪末轻，坏得野哚！俚个爷问俚：‘高老爷个对子为啥勿对？’俚说：‘我对个哉，为仔尹老爷一淘来浪，勿曾说。’问俚：‘对个啥？’俚说：‘对“尚书清客”。’”仲英大笑道：“为啥勿说‘狎客’囗？索性骂得爽快点哉（口宛）。”亚白、痴鸳共笑一阵。
席间上到后四道菜，管家准备鸡缸杯更换。大家止住，都欲留量，以待晚间畅饮。齐韵叟不复相强，用饭散席。
