张爱玲提示您：看后求收藏（启明小说www.qmxs.net），接着再看更方便。
瑶官见说，真个出门去看。韵叟亦即起立，笑挽琪官的手，道：“倪到拜月房找去。”举步将行，忽闻门外瑶官高声报说：“朱五少爷来。”韵叟诧异得紧，抬头望外，果然朱淑人独自一个，翩翩然来。韵叟请其登榻对坐，良久默然。韵叟搭汕问道：“听说前日捉着一只‘无敌将军’，阿有价事？”淑人含糊答应，并未接说下去。
又良久，淑人面色微红，转睐偷盼，似有欲言不言光景。韵叟摸不着头脑，顾令琪官喊茶。琪官会意，拉同瑶官退出门外，单剩韵娶、淑人在眠香坞中。
第五十三回终。
第五十四回 负心郎模棱联眷属 失足妇鞭箠整纲常
按：朱淑人见眠香坞内更无别人，方嗫嚅向齐韵叟道：“阿哥教我明朝转去，勿晓得阿有啥事体？”韵叟微笑道：“耐阿哥替耐定亲呀，耐啥勿曾晓得？”淑人低头蹙额而答道：“阿哥末总实概样式。”韵叟听说。不胜惊讶道：“替耐定亲倒勿好？”淑人道：“勿是个勿好，故歇无啥要紧（口宛）。阿好搭阿哥说一声，（要勿）去定啥亲？”韵叟察貌揣情，十猜八九，却故意探问道：“故末耐啥意思囗？”连问几声，淑人说不出口。
韵叟乃以正言晓之，道：“耐（要勿）去搭阿哥说。照耐年纪是该应定亲个辰光。耐咿无拨爷娘，生来耐阿哥做主。定着仔黎篆鸿个囡仵，再要好也无拨。耐故歇勿说阿哥好，倒说道（要勿）去定啥亲；（要勿）说耐阿哥听见仔要动气，耐就自家想，媒人才到齐，求允行盘才端正好，阿好教阿哥再去回报俚？”淑人一声儿不言语。韵叟道：“虽然定亲，大家才要情愿仔末好。耐再有啥勿称心索性说出来，商量商量倒无啥。我替耐算计，最要紧是定亲，早点定末早点讨，故末连搭仔周双玉一淘可以讨转去，阿是蛮好？”
淑人听到这里，咽下一口唾沫，俄延一会，又嗫嚅道：“说起个周双玉，先起头就是阿哥代叫几个局，后来也是阿哥同得去吃仔台酒，双玉就问我阿要讨俚。俚说俚是好人家出身，今年到仔堂子，也不过做仔一节清倌人，先要我说定仔讨俚个末，第二户客人俚勿做哉。我末倒答应仔俚。”韵叟道：“耐要讨周双玉，容易得势，倘然讨俚做正夫人，勿成功个囗。就像陶玉甫，要讨个李漱芳做垫房，到底勿曾讨，（要勿）说是耐哉。”
