张爱玲提示您：看后求收藏（启明小说www.qmxs.net），接着再看更方便。
阿珠忙将烟枪去打通条，双玉远远地坐着，望巧囤丢个眼色。巧囤即向梳妆台抽屉里面取出一只玻璃缸，内盛半缸山查脯，请王老爷、洪老爷用点。莲生忽然感触太息。阿珠通好烟枪，替莲生把火，一面问道：“难小红先生搭就是个娘来里跟局？”莲生点点头。阿珠道：“价末大阿金出来仔，大姐也勿用？”莲生又点点头。阿珠道：“说要搬到小房子里去哉呀，阿有价事？”莲生说：“勿晓得。”
阿珠只装得两口烟，莲生便不吸了，忽然盘膝坐起，意思要吸水烟。巧囤送上水烟筒，莲生接在手中，自吸一口，无端吊下两点眼泪。阿珠不好根问。双珠、双三面面相觑，也自默然。房内静悄悄地，但闻四壁厢促织儿“唧唧”之声，聒耳得紧。
善卿揣知莲生心事，无可排遣，只得与双珠搭讪些闲话。适见房门口帘子一扬，探进一个头来望望，似乎是小孩子。双珠喝问：“啥人？”外面不见答应。双珠复喝道：“跑得来！”方才遮遮掩掩，踅至双珠面前。果系阿金的儿子阿大，咭呱咕噜告诉双珠，不知说的甚么。双珠鼻子里哼了一声，阿大逡巡退出，随后楼下“踢蹋蹋”一路脚声，直跑到楼上房间里。双珠见是阿金，生气不理。阿金满面羞惭，溜出中间与阿大切切商量。善卿不觉失笑。
莲生再躺下去吸两口鸦片烟，遂令阿珠喊来安打轿。善卿及双珠、双玉都送至楼门口而别。
王莲生去后，善卿径往双珠房间。阿珠收拾既毕，特地过来问善卿道：“王老爷为啥气得来？”善卿叹道：“也怪勿得王老爷。”阿珠道：“王老爷做仔官末，该应快活点，再有啥气嗄？”善卿道：“起先，王老爷阿是一径喜欢个沈小红？为仔沈小红勿好末，去讨仔个张蕙贞。陆里晓得张蕙贞也匆好，难末为仔张蕙贞勿好，再去做个沈小红。做末来浪做，心里末来浪气。”阿珠道：“张蕙贞啥个勿好？”善卿道：“也不过勿好末哉，说俚做啥？”阿珠乃说出前日往王莲生公馆听张蕙贞被打一节。善卿亦说道：“险个！王老爷打仔一泡，勿要哉。张蕙贞末吃个生鸦片烟，原是倪几个朋友去劝好仔，拿个阿侄本赶出，算完结该桩事体。”阿珠亦叹道：“张蕙贞也忒啥个勿挣气，拨沈小红晓得仔，故末快活得来，要笑煞哚！”
刚刚讲得热闹，外场喊报：“小先生出局。”阿珠回对过房间跟周双玉出局去了。善卿转向双珠道：“可惜王老爷要去哉；勿然，让俚做双玉，倒蛮好。”双珠道：“说起仔双玉，想着哉。倪无女每要商量句闲话，我倒忘记脱仔勿曾说。”善卿急问：“啥闲话？”双珠道：“倪双玉山家园转来，一径勿肯留客人。我同无女每说仔好几转，俚说五少爷定归要讨俚，说好个哉，倪勿好说穿俚。请耐去问五少爷，该应那价样式。要讨末讨得去，勿讨末教五少爷自家搭双玉说仔声末，让俚做生意，阿对？”善卿道：“双玉倒勿靠帐俚，花头大得野哚。”双珠道：“俚哚两家头才是拗空！（要勿）说五少爷定仔亲，就匆定末，阿能够讨双玉去做大老母？”
